Дереккөз бен фото: ©kaztag.kz
Астана. 18 қыркүйек. ҚазТАГ – Қазақстандық диджей Imanbek (Иманбек Зейкенов) әлемдегі ең беделді музыкалық марапат – «Грэммиге» қайтадан ұсынылды, деп хабарлайды агенттіктің тілшісі.
«Латын электронды музыкасының үздік интерпретациясы – вокалды немесе аспаптық жазбалары бар жеке орындаушыларға, дуэттерге немесе топтарға арналған, латын электронды музыкасының жаңа материалын қамтитын тек синглдер немесе тректер: (…) Ella Quiere Techno – Imanbek & Taichu», —
делінген «Грэмми» сыйлығының 2025 жылғы үміткерлер бөліміндегі парақшасында.
Imanbek пен Taichu орындауындағы Ella Quiere Techno трекі Warner Music Latina Inc. компаниясымен шығарылған.
Imanbek – қазақстандық диджей әрі продюсер, ол SAINt JHN орындаған Roses трегіне жасаған ремиксі арқылы жаһандық құбылысқа айналды. Бұл ремикс оған 2021 жылы «Жылдың үздік ремиксі» санатында «Грэмми» сыйлығын әперді. Ол Қазақстаннан шыққан алғашқы әртіс ретінде осы беделді музыкалық марапатқа ие болып, қазақ электронды сахнасының халықаралық деңгейде мойындалуында жаңа кезең ашты. Сонымен қатар Imanbek посткеңестік кеңістікте классикалық емес музыка санатында «Грэмми» иегері атанған алғашқы әртіс болды, бұл оны халықаралық электронды музыкадағы маңызды тұлғаға және ТМД аймағының жаһандық сахнадағы серпілісінің символына айналдырды.
